Við óskum öllum þeim kylfingum til hamingju sem náðu “holu í höggi” árið 2011.
Flestir kylfingar láta sér dreyma um að ná “holu í höggi” en aðeins lítið brot af þeim nær þessum merka áfanga. Í byrjun árs 2012 verða viðurkenningar fyrir holu í höggi árið 2011 afhent þeim sem náðu draumahögginu og eru skráðir hér á síðunni sem einherjar.
Þessi viðurkenning er gömul hefð í Einherjaklúbbnum. Þetta er eina viðurkenningin eða staðfestingin sem hver og einn fær fyrir þetta afrek. Þar að segja frá Einherjaklúbbnum. Hver og einn verðlaunar sig svo fyrir afrekið eftir efnum og ástæðum og eftir því hvað hann telur það vera stórt. Sumir hafa skjalið góða innrammað upp á vegg heima hjá sér eða í vinnunni - eða jafnvel á náttborðinu sínu - en aðrir henda skjalinu niður í skúffu. Sannur Einherji heldur því þó ávallt á lofti að hann eða hún hafi sko farið holu í höggi.
Fyrsti formaður Einherjaklúbbsins var Páll Ásgeir Tryggvason. Sigurjón Hallbjörnsson tók síðan við af honum. Árið 1975 tilkynnti stjórn Einherjaklúbbsins eftir Einherjamót á Nesvellinum að Kjartan L.Pálsson yrði næsti formaður, þar sem hann hefði þá farið oftast holu í höggi af öllum Íslendingum eða sex sinnum. Í júni 2008 náði Björgvin Þorsteinsson þeim áfanga að fara holu í höggi í sjöunda sinn og tók þar með við formennsku í klúbbnum.